Ons het heelwat bespreking gehad om te besluit of ons hierdie webtuiste in Afrikaans moet doen, en of ons dit in Afrikaans sowel as Engels moet publiseer. Hoewel dit waar is dat die meeste Suid Afrikaanse Venters, Afrikaans sprekend is, is dit ook waar dat daar heelwat Engels sprekende Venters in Suid Afrika is. Verder het daar ook baie van die Venter familie die land verlaat en hulle gaan vestig in Europa, Amerika, Australie ens. en baie van hierdie gemeenskappe (veral vanaf die tweede geslagte) is nie meer bekend met Afrikaans nie. Indien ons hierdie webtuiste net in Afrikaans sou publiseer, word hierdie familielede uitgesluit en kan hulle nie deel in die ryk en interessante geskiedenis van die Venter familie nie. Dan ook is die Internet hoofsaaklik 'n Engelstalige medium en ons het gevoel dat ons graag almal (of so veel moontlik) wil bereik en van ons geskiedenis vertel. Om die webtuiste in Afrikaans en Engels te publiseer is nie haalbaar nie, en dit verdubbel die werk en instandhouding van hierdie werf. Ons het dus besluit om slegs in Engels te publiseer.

 Julle is welkom om in Afrikaans met ons te kommunikeer, of op die Venter Gemeenskap Forum in Afrikaans te skryf, maar ons wil tog wel vra dat julle ons Internasionale besoekers in ag moet neem, sodat hulle ook kan deel in wat geskryf word.

 Stuur vir ons 'n Tweet (Twitter) in Afrikaans by @VenterCommunity

 Almal is welkom, maar ons sal geen inhoud aanvaar wat 'n politieke, godsdienstige, rassistiese of seksistiese basis het nie. Laat hierdie liewer vir besprekings op ander forums. Nie almal glo of dink dieselfde nie. As dit so was, sou ons almal aan dieselfde politieke party of godsdienstige oortuiging behoort het.

 Hierdie webtuiste is tot stand gebring omdat ons nerens 'n "regte" Venter tuiste kon opspoor wat gaan oor die Venter geskiedenis nie, en wat uitgebreide inligting in hierdie opsig bevat nie. Meeste webtuistes behoort aan individue en fokus rondom persoonlike familie geskiedenis en voor/nageslagte. Baie van hierdie tuistes publiseer ook verkeerde inligting en ons het gevoel dat 'n onafhanklike Venter "plek" op die Internet nodig is.